ThanDe Lab
ThanDe Lab
ek muKhtasar afsaana
Syed Tafseer Ahmad
maiN Star Buck coffee House meN daaKhil huaa aur baiThne ke liye har taraf nazar dauRaaii lekin koii seat Khaalii nahiiN thii. maiN Order karne waalii line meN kharaa ho gayaa. lunch kaa waqt thaa. maiN ne sochaa k jab tak maiN khiRkii tak pahoNchuuNgaa koii na koii seat Khaalii ho jaayegii. coffee lene ke ba'd ek daf'a maiN ne phir se jagah talaash karne ke liye har taraf nazar dauRaaii lekin koii seat Khaali nahiiN thii. maiN counter par tek lagaa kar khaRaa ho gayaa. har taraH ke log aa jaa rahe the. qareeb kii university se taalib-e-'ilm, office workers aas paas kii buidingoN se aur vo log jo k Khareedaarii se waqfa le rahe the.
Vo akeli glass kii deevaar ke nazdeek ek kursii par baiThii thii. uskii mez par ek Khaalii coffee kaa cup thaa aur uskii nigaah mez par rakkhe huye parche par thii. baaloN kii ek laT uske gaaloN ko chhoo rahii thii . maiN ne uskii aaNkhoN se aaNsuuoN ko gaaloN par Dhalakte dekhaa. aaNsoo gaaloN se phail kar kaaGhaz ke parche par gire. maiN ne andaaza lagaane kii koshish kii k us kaaGhaz par kia likhaa ho saktaa hai jo k ek Haseen laRkii ko sar-e-'aam rulaa de. shaayad usse uske maHboob ne milne kaa va'da kiyaa thaa lekin nahiiN aayaa yaa Khat ghars e aayaa ho aur vaalidain ne uskii shaadii aur kisii se karne kaa va'da kar liyaa ho yaa vo uskii paRhaaii ke paise nahiiN bhej sakte.
maiN abhii yeh soch hii rahaa thaa aur merii nazareN us par thii k us ne apnii nazreN oopar uThaayiiN. hamaarii nazreN ek lamHa ke liye miliiN aur us ne apnii aaNkhoN ko phir se jhukaa liyaa. yeh aaNkheN kitnii udaas haiN. maiN ne unkaa dard maHsoos kiyaa. us ne Khat ko phir se paRhaa aur uske gaaloN par kii ek lakeer sii ban gaii
achaanak vo khaRii ho gaii aur tezii se darvaaze kii taraf chali gaii. us ne darvaaza kholaa aur fooTpaath par utar gaii. maiN ne us bheeR meN us par nigaah rakhne kii koshish kii. vo traffic signal ke paas rukii. ek lamha vo fooTpaath pe thii aur duusre lamHe saRak par. maiN ne car kii brakoN kii aawaaz sunii. cup rakh kar maiN baahar dauRaa. log uske ird gird jam'a the. maiN ne baRii mushkil se raasta banaayaa. vo Khoon meN latpat thii.
"kia kisii ne ambulance ke liye call kiyaa?". maiN chillaayaa
"haaN!" kisii ne kahaa
maiN ne uske qareeb baiTh kar uskii nabz talaash karne kii koshish kii. nabz nahiiN thii. . dil bahot aahistagii se dhaTak rahaa thaa.
koii chillaayaa, "C.P.R. to do".... maiN ne phir se uske dil kii aawaaz sunni chahaa. Khaamoshii, bilkul Khaamoshii. . saRak par mukammil Khaamoshii chhaa gaii.
dheere se maiN ne kaaghaz ke parche ko uske haath se judaa kiyaa. us par likhaa thaa:
maiN tumhaare baGhair zinda nahiiN rah saktaa. tumheN jab yeh Khat milegaa, maiN is dunyaa ko chhoR chukaa huuNgaa.
ek maddham aawaaz uske purse meN rakkhe huye cell phone se aa rahii thii
maiN ne phone meN kahaa, "Ji"
"kia Naaz vahaaN haiN? mujhe unko nahiot zaroorii paiGhaam denaa hai"
"tum kaun ho?", maiN ne poochhaa
"maiN uskaa bhaii huuN. Naaz se kahnaa k Jameel zinda hai"
mere haath se cell phone gir gayaa
